لیکنه: محمد قاسم یار/ تعلیم السلام ویب پاڼه 

پر یوه اړخ مي درد پر بل سکون دئ

پر یوه اړخ مي درد پر بل سکون دئ
د هستۍ یو نوم اجل بل یې ژوندون دئ

زړه طالب که د الفت په مدرسه کي
یاره عشق هلته استاد مینه مضمون دئ

لا مِعیار د سړیتوب مال و دولت دی
لا په دې ښار کي همدغه شوم قانون دئ

له پردي جنګه یې ساته زما د خاوري 
هره پېغله یې لیلا ځوان یې مجنون دئ

خدایه مینه د قلم ورکې په زړو کي 
جنګ خو هسي هم په برخه د پښتون دئ

بېګا خوب وینمه تاج پر سر باچا یم
چي را ویښ سوم سر مي پروت ستا پر زنګون دئ

بدرګه را سره ستوري وړمه(یاره)
هله هله د سپوږمۍ پر لوري یون دی

www.taleemulislam.net