سورة المائدة 

لیکنه: ویس احمد ابراهيم / تعلیم الاسلام ویب پاڼه

سورة المائدة  د تلاوت او مصحف د ترتيب په اعتبار د قران کريم پنځم سورة دئ. دا مبارک سورة تر هجرت وروسته، يعني په مدينه منوره کي نازل سوی دئ.

سورة المائدة ۱۲۰ آيتونه او ۱۶ رکوع لري.

د دې سورة نوم د ۱۱۲ آية څخه اخستل سوی دئ، چي الله تعالی فرمايي: ( إِذْ قَالَ ٱلْحَوَارِيُّونَ يَـٰعِيسَى ٱبْنَ مَرْيَمَ هَلْ يَسْتَطِيعُ رَبُّكَ أَن يُنَزِّلَ عَلَيْنَا مَآئِدَةًۭ مِّنَ ٱلسَّمَآءِ ۖ قَالَ ٱتَّقُوا۟ ٱللَّهَ إِن كُنتُم مُّؤْمِنِينَ)

ژباړه: او کله چي د عيسی ابن مريم حواريون (يعني پيروانو ئې) ور ته وويل: ايا ستا رب به موږ ته د اسمان څخه سترخان (يعني غذا او ډوډۍ) را واستوي، (عيسی عليه السلام) ور ته وويل د الله تعالی تقوا اختيار کئ که تاسو مؤمينان ياست.

مائده؛ يعني سترخوان، د ډوډی خوړولو دسترخوان. 

په دې سورة کي تر بل هر سورة د (يَـٰٓأَيُّهَا ٱلَّذِينَ ءَامَنُوٓ) اې هغه کسانو چي ايمان مو راوړی دئ. خطاب ډېر کارول سوی دئ.

په سورة المائدة کي لاندني موضوعاتو ته اشاره سوې ده

۱-  د حلال او حرام غذا (يعني طعام) تر منځ تفکيک او واضح کول؛

۲-  د اهل کتاب د لاس خورک او د ښځو سره ئې د نکاح کولو بيان؛

۳-  بني اسرائيل د څلويښت ۴۰ کالو له پاره د ارض الموعده (يعني د وعده سوي مځکي) څخه بند سوه؛

۴-  د حضرت آدم عليه السلام د زامنو قصه چي قابيل هابيل قتل کی؛

۵-  د غله له پاره د سزا حکم؛

۶-  د غسل، اودس او تيمم بيان؛

۷-  لمونځ اداء کول او زکات ورکول پر يهودانو او عيسويانو هم دغسي فرض ول؛

۸-  يهودانو او عيسويانو ته د اسلام د دين دعوت؛

۹-  هغه څوک چي د الله عزوجل د اوامرو مطابق فیصلې نه کوي، هغه کافران، ظالمان او تر حد تېرېدونکي دي؛

۱۰-  شراب او خمار (قمار) مطلق حرام دي؛

۱۱-  د حضرت عيسی عليه السلام معجزې او د ده مبارک دعا چي الله تعالی د ده و حوارين ته د جنت څخه مائدة (د غذاء ډک سترخوان) راواستوي.

www.taleemulislam.net