ژباړه: سمیع الله دُرانی
یو سړي له یوې عالِمي ښځي سره واده کړی ؤ، د واده څخه وروسته یې میرمني ورته وویلي وه: زه د شریعت مطابق ژوند تیرول غواړم!
هغه سړی په دې خبره ډیر خوشحاله سو چي دا خو بیخي ښه خبره سوه چي د خپلي میرمني په برکت سره ژوند د شریعت مطابق تیروم.
ښځي یې څه وخت وروسته ده ته وویل: وګوره! موږ په کور کي د شریعت مطابق د ژوند تیرولو وعده کړې وه، او په شریعت کي پر ښځي باندي د کور خدمت واجب نه دئ او د شریعت مطابق خاوند باید د میرمني لپاره د علیحده کور د پیدا کولو بند وبست وکړي، نو لهذا زما لپاره علیحده کور جوړ کړه.
هغه سړی ډیر پریشانه سو، له ځان سره یې ویل چي د جلا کور نیول دومره قصه نه ده خو زما د مور او پلار سره به څه کیږي؟!
زه به د خپل مور او پلار سره څه کوم؟!
پدې تشویش کي سو، ددې اړوند مفتي صاحب ته ورغلی، مسئله یې مفتي صاحب ته بیان کړه؛
مفتي صاحب ورته وویل: چي هغه خو سمه خبره کوي.
سړي مفتي صاحب ته وویل: زه تا ته د مسئلې د حل لپاره راغلی یم د فتوا اخیستلو لپاره نه.
مفتي صاحب ورته وویل: یوه طریقه سته، هغه طریقه داسي ده، ته ولاړسه خپلي میرمني ته ووایه چي په شریعت کي دوهم واده جواز لري، لهذا زه دوهم واده کوم او هغه به زما د والدینو خدمت کوي، ستا لپاره علیحده کور رانیسم، ته به هلته اوسېږې.
میرمني یې په دغه جواب سره پریشانه سوه او ویې ویل: ودریږه! دوهم واده مه کوه، زه همدلته ستا د والدینو سره اوسیږم، ستا والدین زما والدین دي او د هغوی خدمت او اکرام ثواب هم لري.
سبق: ددې لپاره وخت وباسئ چي د یو مولوي صاحب سره کښینئ او مسئلې ځني وپوښتئ، د هري مسئلې حل په ګوګل کي نه وي.
همدارنګه د شریعت مطابق ژوند تیرول موږ مسلمانان د ژوند له سختو مشکلاتو خلاصوي.
