سورة القمر د مصحف او تلاوت په اعتبار ۵۴ سورة دئ، چي د هجرت څخه تر مخه په مکة معظمة کي نازل سوی دئ.

سورة القمر ۵۵ آية دئ او ۳ رکوع لري.

د دې سورة نوم د اول آية څخه اخستل سوی دئ، چي الله تعالی فرمايي: اقْتَرَبَتِ السَّاعَةُ وَانْشَقَّ الْقَمَرُ.

ژباړه: هغه ساعت (او ګړی) را نژدې سو او سپوږمۍ شق (يعني سره پرې) سوه.

قمر - سپوږمۍ ته وايي.

په سورة القمر کي لاندي موضوعات ذکر سوي دي

۱-  هغه ساعت (او ګړی) را نږدې دئ (يعني د قيامت ورځ ډېره نږدې ده) او سپوږمۍ دوه ځايه سوه (چي دا معجزه الله تعالی و رسول الله صلی الله علیه وسلم ته ورکړه).

۲-  نوح (علیه السلام) ته د ده قوم د درواغجن خطاب وکئ، نو ده مبارک دعا وکړه، او الله تعالی د ده قوم په اوبو سره غرق کئ او هلاک سول.

۳-  الله تعالی قرآن کريم د مذاکرې له پاره آسانه کړی دئ.

۴-  د عاد قوم خپل د نبي تکذيب وکئ او الله تعالی دوی په باد سره تباه کړل.

۵-  د ثمود قوم خپل د نبي تکذيب وکئ او الله (رب العزة) دوی په يوه چغه او ناره سره هلاک کړل.

۶-  د لوط (عليه السلام) قوم خپل نبي ته د درواغجن ويلو خطاب وکئ؛ نو الله تعالی پر دوی ډبري واورولې، او ټوله ئې تباه کړه، بغير د لوط (علیه السلام) او د ده د کورنۍ څخه. او شکر ادا کونکي لره الله تعالی همدغسي بدله ورکوي.

۷-  فرعون او د ده و قوم ته د الله تعالی له طرفه خبرداری رالی، خو دوی هغه درواغ وګڼل، نو د الله (عزوجل) له لوري دوی ټوله غرق سوه او هلاک سوه.

۸-  کفارو هر وخت د حق مخالفت کړی دئ او د خپل نبي کارنامو ته ئې سحر او جادو ويلی دئ، او خپل د خواهشاتو پيروي ئې کړي ده.

۹-  ټول کافر قومونه چي وختي تېر سوي دي، الله (عزوجل) هغوی خپل د کفر له وجي هلاک کړل، (يعني د الله تعالی په نزد تر هر څه مقدم عقيده او ايمان دئ).

۱۰-  په ورځ د آخرت به همدغه کفار په عذاب اخته وي او متقيانو ته به جنتونه وي.

www.taleemulislam.net