تازه سرليکونه
د (نبوي سیرت) نورې ليکنې
تازه سرليکونه
بېلابېلې ليکنې
د عبدالله واده او د محمّد ﷺ مبارک ميلاد (۳۱)
  تعلیم الاسلام ویب پاڼه
  August 1, 2018
  0

نبوي سیرت (۳۱ برخه)


لیکنه: مولوي عنایت الله علمي / تعلیم الاسلام ویب پاڼه

 

    د عبدالله واده او د محمّد  ﷺ مبارک ميلاد

اوس نو عبدالله ځوان دى او پلار يې غواړي چي واده ور وکړي نو يې يوه د عزت او شرف خاونده ښځه چي دا هم د عبد مناف بن زهره بن کلاب د اولادې څخه وه ور وغوښتل او  د دې ښځي نوم آمنه بنت وهب ؤ، چي د رسول الله صلی الله علیه وسلم  سره په نسب کي شريکه او د اسماعيل علیه السلام  د اولادې څخه ده، چي په دې ډول سره رسول الله صلی الله علیه وسلم  د مور او پلار د طرفه د ډېر مشرف او معزز  نسب خاوند دى، د رسول الله صلی الله علیه وسلم  ماما ګانو په یثرِب کي ژوند کاوه او آمنه هم هَلته اوسېدل، عبدالمطلب هَلَته په یثرِب کي د عبدالله واده وکړی او  بيا مکې مکرمې ته راغله، په دغه موده کي آمنه حامله سوه او  د دې تر حمل څو مياشتي وروسته عبدالله وفات سو، نو رسول الله صلی الله علیه وسلم د مخه تر دې چي دنيا ته تشريف را وړي د پلار د طرفه يتيم سو. 

 

کوم وخت چي د محمّد مصطفْی صلی الله علیه وسلم  د ولادت وخت رانژدې سو مور يې خوب وليدى چي د دې يو کوچنئ پيدا کيږي او د دغه کوچني سره يو نُور يا روښنايي او ځلا ملګرې وي چي د مځکي مخ ډکوي او دغه نُور تر شامه پوري ورسيږي او دا په دغه خوب کي وايي (اُعِيذُهُ بِاللهِ الوَاحِد، مِن شَرِّکُلِ حَاسِد) يعني: ده لره په يوه الله سره د هر حسـد کونکي څخه ساتـنه غواړم، سره د دې چي دوى مشرکان وه خو بيا يې هم دغسي خوب وليدى چي پناه او ساتنه يې په يوه الله جل جلاله  سره غوښتل.

 

 د فيل په کال او د فيل تر واقعې پنځوس ورځي وروسته د ربيع الاول د مياشتي په دوولسمه بلکه په راجحه روايت کي د ربيع الاول د مياشتي پر نهمه د دوشنبې په ورځ سرورِکائنات، اشرف المخلوقات، رحمةٌ لّلعالمين، محمّد مصطفْی صلی الله علیه وسلم  و دنيا ته تشريف را وړى چي دغه مبارکه ورځ د ميلادي سنې د (٥٧١) کال د اپرېل د مياشتي د (٢٠) يا (٢٢) تاريخ سره موافق او برابره ده او  دا چي موږ (۲۰) يا (٢٢) تاریخ وايو دا د هغه وخت په جنتريو کي فرق ؤ، د يوې جنترۍ يا کلینډر په حساب (٢٠) تاريخ ؤ او د بلي جنترۍ په حساب (٢٢) تاريخ ؤ، او د ده  صلی الله علیه وسلم  د ولادت په وخت کي ډېر عجيب او د عادته څخه مخالف واقعات پېښ سوه، چي اوس به د هغو واقعاتو څخه ځيني درته بيان سي خو دا بيان يې په دې سبب نه دى چي د ده صلی الله علیه وسلم  شرف او عظمت په دغو شيانو کي دى چي د ده صلی الله علیه وسلم  د ولادت سره پېښ سوه، یا! 

 

بلکه دا هغه علامې دي چي د ده  صلی الله علیه وسلم  د را تګ زيري پکښې دي که نه اصلاً د رسول الله صلی الله علیه وسلم  عظمت او لويي په هغه رسالت او منهج کي دی چي ده صلی الله علیه وسلم  موږ ته را وړی دی، دغه شيان صرف د ده  صلی الله علیه وسلم  د را تګ زيري او علامې دي.

 

د رسول الله صلی الله علیه وسلم  د حضور شاعر حَسّان بن ثابت رضی الله عنه  چي د مدینې منورې د انصارو څخه دی وايي: زما عمر اوه کاله ؤ او په دغه ورځ چي رسول الله صلی الله علیه وسلم  و دنيا ته تشريف را وړى زه په مدينه منوره کي د يهودو په منطقه کي د يهودو سره وم چي د يهودو يو راهب پر قلا ختلى ؤ او داسي نارې يې وهلې: اې یهودیانو! نن د احمد ستورى ښکاره سو، هغه ستورى ښکاره سو چي نه ښکاره کيږي مګر د احمد ﷺ په پيدا کېدلو سره. 

 

يعني: يو ستورى دى چي تر هغو نه راخېژي ترڅو چي خاتِمُ الأنبياء محمد ﷺ پيدا نه سي او  هغه ستورى نن راختلى دى، حَسّان بن ثابت رضی الله عنه  دا شاهدي آداء کوي چي ده دغه خَبَره د يهودو څخه واورېدل او د دې څخه دا هم معلومه سوه چي حَسّان رضی الله عنه  تر رسول الله صلی الله علیه وسلم  اوه کاله په عمر زيات دى. 

 

 د رسول الله ﷺ د مبارک ميلاد د زيرو او بشارتو څخه يو هم دا دى: کوم وخت چي د ده  صلی الله علیه وسلم  مور حامله سوه دغه د دې حمل بېله دردو او بېله تکليفه څخه ؤ، که څه هم تاسي ته معلومه ده چي حمل یا د ښځي د پاره حامله کېدل همېشه د تکاليفو او دردو سره وي، خو د رسول اللهﷺ مور د دغو دردو څخه آرامه او فارغه وه. 

 

د رسول اللهﷺ د ولادت د عجائبو څخه یوه هم دا ده: کوم وخت چي دئ ﷺ پيدا سو پر دواړو لاسو يې تکيه کړې وه او سر يې لوړ نيولى ؤ لکه آسمان ته چي ګوري بل دا چي دئ صلی الله علیه وسلم  مختون و زېږېدى يعني: سنت کړل سوى ؤ او  مسرور و زېږېدى يعني: نُو يې هم پرې سوى ؤ، زموږ د کوچنيانو نُو خو د مور څخه ور پرې کړي او هغه پاته حصه بيا څو  ورځي وروسته لوېږي خو رسول الله صلی الله علیه وسلم  د دغو شيانو څخه فارغه پيدا سو.

 

نور بیا...


ماخذ: د سرورِ کائنات صلی الله علیه وسلم ژوند

سرته